Падзеі апошніх некалькіх тыдняў, безумоўна, шакавалі ўвесь свет. Вельмі цяжка вяртацца да руцінных заняткаў пасля маштабнага масіву трагічных зводак з Украіны.
Узброеныя сілы Украіны, сілы тэрытарыяльнай абароны, валанцёры ўнутры і за межамі краіны, палітыкі і незалежныя журналісты, блогеры і бізнес - увесь прагрэсіўны свет адзіным фронтам выступіў супраць ашчэранага ракетамі мракабесся імперыі.
Не варта забываць і пра тых герояў, якія знаходзяцца ў зняволенні ў рэжымаў. У прыватнасці, пра беларускіх палітычных зняволеных.
Апошнія некалькі гадоў унутраны палітычны клімат у Беларусі інакш як непрыхаваным тэрорам супраць нязгодных апісаць немагчыма. Зачыстка непажаданых адбываецца на ўсіх узроўнях, прававыя інстытуты знішчаныя, а мараль і здаровы сэнс топчуцца патрэбамі марыянеткавага рэжыму Лукашэнкі дзеля захавання ўлады.
На момант напісання гэтага тэксту ў закладніках у дыктатара знаходзіцца [толькі вядомых нам] 1331 чалавек. У многіх з іх ёсць сем'і, разбураныя злой палітычнай воляй, абсалютна ва ўсіх ёсць блізкія людзі, якія падзяляюць найцяжэйшы цяжар падтрымкі чалавека ў зняволенні. Усе пакуты вязня: ад знішчанага ліста і да катавальных умоў утрымання – падзяляюць родныя і блізкія. Тое, што адбываецца цяпер у Беларусі, – сапраўдная катастрофа.
Ваеннае ўварванне Расіі і катастрофа агульнасусветнага маштабу накладваюцца і на лёс нашых палітвязняў. Складанасці ў фінансавай падтрымцы і сувязі з людзьмі, працяглы абвал і без таго дэкларатыўных прававых нормаў у грамадстве, крайняя мілітарызацыя структур улады ствараюць дадатковыя перашкоды ў падтрымцы дысідэнтаў.
Ці азначае гэта, што дапамогі павінна быць менш або шматлікія арганізацыі і фонды павінны апусціць рукі? Ні ў якім разе!
Адзінае, што мы павінны засвоіць з таго, што адбываецца, - нам трэба стаць настолькі эфектыўнымі і арганізаванымі, наколькі мы можам быць.
Менавіта гэтыя людзі, якія выйшлі супраць дыктатуры, былі першай лініяй супраціву. Яны прынялі на сябе ўдар яшчэ адносна ўстойлівага рэжыму, цалкам падтрыманага суседняй крывавай імперыяй. Само іх знаходжанне ў турмах і незламанасць пазіцыі – прамы працяг барацьбы. Маркер, які пазначае беларусаў як нязгодны з несправядлівасцю народ, гатовы змагацца нават там, дзе чалавека пазбаўляюць усяго.
Падтрымка палітычных зняволеных, барацьба за іх у медыйнай прасторы, салідарнасць, выяўленая ў акцыях і маніфестацыях, – неад'емная частка супраціву несправядлівасці азвярэлых рэжымаў Пуціна і Лукашэнкі.
Пакуль усе не будуць свабоднымі!
- Падтрымаць нашы зборы вы можаце па спасылцы.
- Дні нараджэння вязняў.
- Даслаць нам інфармацыю заўсёды можна па кнопцы "Дадаць інфармацыю".