Яраслаў Іванюк этнічны беларус, але нарадзіўся і жыве ў Польшчы. Скончыў беларускую школу на Падляшшы, выхоўваўся ў беларускім асяроддзі. Быў у беларускім аб'яднанні студэнтаў. Працаваў у беларускай рэдакцыі Польскага радыё ў Варшаве, у перадачы "Пад знакам Пагоні" на польскім радыё ў Беластоку. Пяць гадоў быў праграмным дырэктарам беларускай службы "Радыё Рацыя".
"Маё жыццё звязана з беларушчынай, і тое, што я займаюся ёй, - для мяне натуральная справа", - заўважае ён.
Яраслаў - заснавальнік інтэрнэт-бібліятэкі "Камунікат" і выдавец. Доступ да інтэрнэт-бібліятэкі Kamunikat.org Міністэрства інфармацыі РБ заблакавала без тлумачэння прычын у 2023 годзе. Офіс фонду Kamunikat.org знаходзіцца ў Беластоку. Аб намеры і прычынах блакіроўкі доступу да інтэрнэт-бібліятэкі Міністэрства інфармацыі фонду "Камунікат" не паведамляла.
3 сакавіка 2026 года кааліцыю друкаваных выдавецтваў, у якую ўваходзяць "Фонд Kamunikat.org" , Lohvinau Publishing House, Andrei Yanushkevich Publishing, унеслі ў абноўлены МУС спіс "экстрэмісцкіх фарміраванняў". У сувязі з фармаваннем у пераліку згадваюцца Яраслаў Іванюк, Зміцер Колас, Ігар Логвінаў, Вацлаў Багдановіч, Андрэй Янушкевіч, Аляксандр Яўдаха . У яго таксама дададзены сайты і сацыяльныя сеткі выдавецтваў.
