Уладзіслаў вучыўся на першым курсе БДУ і разам з сябрамі вёў ютуб-блог Nick&Bon. 19 студзеня 2022 года яго затрымалі на Нямізе, калі яны здымалі відэаагляд дронаў: супрацоўнікі АМАПа праверылі тэлефоны і знайшлі фота і відэа з Маршу 16 жніўня 2020 года ў Мінску. У ІЧУ на Акрэсціна затрыманых білі.
Праз некалькі дзён Уладзіслава прыгаварылі да 15 содняў адміністрацыйнага арышту за нібыта непадпарадкаванне пры затрыманні, а ў апошні дзень арышту абвясцілі падазраваным па крымінальнай справе. Пасля тыдня ў карцары на Акрэсціна яго перавялі ў СІЗА-1, дзе ён правёў каля двух месяцаў. Праз месяц пасля затрымання яго адлічылі з універсітэта.
У красавіку 2022 года Уладзіслава разам з сябрам Дзмітрыем Таратынавым прызналі вінаватым па крымінальнай справе, распачатай па артыкуле «Арганізацыя і падрыхтоўка дзеянняў, што груба парушаюць грамадскі парадак, альбо актыўны ўдзел у іх», за ўдзел у гэтым маршы, прыгаварыўшы да абмежавання волі з накіраваннем у папраўчую ўстанову адкрытага тыпу.
Пазней Уладзіслаў пакінуў Беларусь.
У снежні 2024 года ў межах спецыяльнай вытворчасці адбылося завочнае судовае пасяджэнне па пытанні ўзмацнення віду пакарання. Вынік пасяджэння невядомы.
