Арцём вучыўся на трэцім курсе БДУІР. 26 кастрычніка 2020 года разам з іншымі студэнтамі ён заходзіў у аўдыторыі і заклікаў далучыцца да агульнанацыянальнай забастоўкі. У адной з аўдыторый у яго завязалася спрэчка з дэканам Леанідам Шыліным, відэа якой потым разышлося ў інтэрнэце. На судзе выкладчыкі і студэнты расказвалі, што заняткі перапыняліся на 5–15 хвілін, а шкоды ўніверсітэту, паводле матэрыялаў справы, прычынена не было.
На наступны дзень Арцёма затрымалі, а пазней МУС апублікавала відэа, на якім ён просіць прабачэння ў дэкана.
У студзені 2021 года Арцёма прызналі вінаватым па крымінальнай справе, узбуджанай па артыкуле «Арганізацыя і падрыхтоўка дзеянняў, якія груба парушаюць грамадскі парадак, або актыўны ўдзел у іх», прыгаварыўшы да абмежавання волі з накіраваннем у папраўчую ўстанову адкрытага тыпу. Яго вызвалілі ў зале суда.
Пазней Арцём пакінуў Беларусь.
У снежні 2024 года ў рамках спецвытворчасці адбылося завочнае судовае паседжанне па пытанні ўзмацнення віду пакарання. Вынік паседжання невядомы.
