Антаніна — юрыстка, выпускніца Беларускага дзяржаўнага універсітэта. Працавала юрысконсультам, натарыусам і галоўным спецыялістам у Міністэрстве юстыцыі. З 2002 года знаходзіцца ў Аб'яднанай грамадзянскай партыі, была ў яе выканкаме і два гады ўзначальвала Камісію па прававых пытаннях Нацыянальнага камітэта. У 2012 годзе абрана намесніцай старшыні партыі, пазней пакінула гэтую пасаду.
Антаніна была затрымана 27 ліпеня 2022 года ў рамках крымінальнай справы, узбуджанай па артыкуле «арганізацыя і падрыхтоўка дзеянняў, якія груба парушаюць грамадскі парадак, альбо актыўны ўдзел у іх».
Паводле абвінавачання, 23 жніўня 2020 года яна «публічна выкрыквала лозунгі, гучна апладыравала, знаходзілася на праезнай частцы, чым блакавала і перашкаджала руху транспарту ў Мінску, у тым ліку гарадскога пасажырскага транспарту „Мінсктранса“».
У лістападзе 2022 года яе прызналі вінаватай і прыгаварылі да пазбаўлення волі.
У красавіку 2023 года Антаніна была вызвалена, цалкам адбыўшы прызначаны судом тэрмін пакарання.
