Уладзімір — актывіст «Маладога фронту». 19 снежня 2010 года ён удзельнічаў у акцыі пратэсту супраць фальсіфікацыі прэзідэнцкіх выбараў у Мінску, а на наступны дзень яго затрымалі пасля пікета салідарнасці з палітвязнямі насупраць Дома ўрада. Уладзімір адбыў 15 содняў адміністрацыйнага арышту ў Жодзіне. Потым яго выклікалі на допыт у КДБ як сведку, і допыт скончыўся яшчэ 7 суткамі арышту на Акрэсціна. 28 студзеня 2011 года Уладзіміра арыштавалі як падазраванага ў справе пра масавыя беспарадкі.
У траўні 2011 года Уладзіміра прызналі вінаватым па крымінальнай справе, узбуджанай па артыкулах «Арганізацыя масавых беспарадкаў» і «Удзел у масавых беспарадках», прыгаварыўшы да пазбаўлення волі ў калоніі. У жніўні таго ж года яго вызвалілі ў межах памілавання.
У 2012–2018 гадах Уладзіміра шмат разоў каралі штрафамі і арыштамі за ўдзел у вулічных акцыях, у тым ліку ў абарону Курапатаў.
23 сакавіка 2022 года Уладзіміра затрымалі зноў. Паводле праўладных каналаў — за выраб і распаўсюд бел-чырвона-белых сцягоў. Спачатку яму прызначылі адміністрацыйны арышт, потым пакінулі пад вартай як падазраванага ў крымінальнай справе пра грубае парушэнне грамадскага парадку і прыкладна праз 10 содняў перавялі ў СІЗА-1 на Валадарскага. На «пакаянным відэа» ён выглядаў збітым. 16 красавіка таго ж года Уладзіміра вызвалілі, аднак ён застаўся ў статусе падазраванага. Чым скончылася справа, невядома.
