10 лютага 2022 года Станіслава затрымалі, і на наступны дзень суд прызначыў яму 15 содняў адміністрацыйнага арышту. Падставай сталі рамкі з арнаментам і «Пагоняй» на нумарах яго аўтамабіля. Пакуль Станіслаў адбываў арышт, супрацоўнікі міліцыі знайшлі ў яго тэлефоне фотаздымак з акцыі пратэсту 16 жніўня 2020 года. Пасля заканчэння арышту яго не адпусцілі: Станіслава затрымалі зноў, ужо па крымінальнай справе, і змясцілі ў СІЗА.
У траўні 2022 года Станіслава прызналі вінаватым па крымінальнай справе, узбуджанай па артыкуле «Арганізацыя і падрыхтоўка дзеянняў, якія груба парушаюць грамадскі парадак, або актыўны ўдзел у іх», за ўдзел у гэтай акцыі, прыгаварыўшы да абмежавання волі без накіравання ў папраўчую ўстанову адкрытага тыпу. Яго вызвалілі ў зале суда.
