Павел — гомельскі прадпрымальнік, уладальнік сеткі крам касметыкі «Красотка». Ён адкрыта крытыкаваў уладу ў сацсетках, а ў 2021 годзе яго аштрафавалі па адміністрацыйнай справе «за распаўсюджванне інфармацыйнай прадукцыі, якая змяшчае заклікі да экстрэмісцкай дзейнасці». Са снежня 2021 года Паўла цкавалі праўладныя тэлеграм-каналы.
У лютым 2022 года супрацоўнікі АМАП затрымалі Паўла проста ў ягонай краме і надзелі на яго кайданкі. Паводле версіі абвінавачання, у верасні 2020 года ён выклаў ва «УКантакце» скрыншот з кадрам пратэстаў на вуліцы Савецкай у Гомелі, назваў сілавікоў «недалюдзьмі» і выказаў надзею, што яны «адкажуць за злачынствы супраць свайго народа». Павел прызнаў, што размясціў пост, але адмаўляў намер распальваць варожасць.
У жніўні 2022 года Паўла прызналі вінаватым па крымінальнай справе, узбуджанай па артыкуле «Распальванне расавай, нацыянальнай, рэлігійнай альбо іншай сацыяльнай варожасці або варажнечы», за гэты пост пра сілавікоў.
Вызвалены ў лістападзе 2023 года, цалкам адбыўшы прызначаны судом тэрмін пакарання.
