Да затрымання Марына працавала дызайнеркай у гандлёвай сетцы «Карона»: афармляла банеры і іншую друкаваную прадукцыю.
2 лютага 2022 года яе затрымалі па крымінальнай справе аб абразе Лукашэнкі. Спачатку Марыне прызначылі адміністрацыйны арышт, а пасля яго заканчэння не адпусцілі і перавялі ў СІЗА. Пазней ёй прад'явілі яшчэ адно абвінавачанне — за ўдзел у пратэстным маршы, які прайшоў у Мінску ў 2020 годзе.
У верасні 2022 года Марыну прызналі вінаватай па крымінальнай справе, узбуджанай па артыкулах аб абразе Лукашэнкі і аб актыўным удзеле ў дзеяннях, якія груба парушаюць грамадскі парадак, за ўдзел у спальванні пудзіла, якое выяўляла Лукашэнку, і ў гэтым маршы. Прадпрыемства «Мінсктранс» прад'явіла асуджаным па гэтай справе пазоў на 15 тысяч беларускіх рублёў — агульную суму на ўсіх.
Вызвалена ў красавіку 2024 года, цалкам адбыўшы прызначаны судом тэрмін пакарання.
