У красавіку 2024 года сілавікі пісалі аб затрыманні неназваных 2 мужчын з-за таго, што тыя знялі дзяржфлаг з дзіцячага садка ў Брэсце. Тады сілавікі ўдакладнялі, што аднаму мужчыну 25 год, другому 46 год. І пагражаліся крымінальнай адказнасцю за "здзек" над дзяржсімваламі.
Тады ж сілавікі выклалі відэа здарэння. На тых кадрах бачна, што 2 мужчын ідуць ад брамкі па дарожцы да будынка. Затым адзін мужчына падсадзіў другога, і такім чынам яны знялі з фасада дзяржфлаг разам з дрэўкам. Потым яны выйшлі з тэрыторыі ўстановы праз брамку, крыху памахаўшы сцягам.
СМІ знайшлі ў сацсетках 46-гадовага чалавека з Брэста на імя Канстанцін Пянчук. І знайшлі ў сацсетках брэстаўчаніна, якому ў красавіку было 25 гадоў (на дадзены момант ужо 26 гадоў) з імем Станіслаў Лугавы. Гэта дае падставы меркаваць, што мужчын з такімі імёнамі судзяць менавіта за зняцце дзяржфлага з дзіцячага садка ў красавіку-2024.
