Генадзь прыйшоў у міліцыю не пазней за 1994-ы. Большая частка яго кар'еры была звязана з аховай грамадскага парадку і працай з непаўналетнімі.
У жніўні 1994 года Майсейчык працаваў участковым інспектарам Ленінскага РУУС Мінска. Праз год перайшоў у інспекцыю па справах непаўналетніх. Быў участковым, пасля старэйшым участковым інспектарам, а ў 2001 годзе ўзначаліў інспекцыю па справах непаўналетніх Ленінскага РУУС. Пазней Майсейчык перайшоў у Маскоўскае РУУС. На пачатак 2015 года ён займаў пасаду намесніка начальніка аддзела аховы правапарадку і прафілактыкі і меў званне падпалкоўніка міліцыі.
У архіве сайта адміністрацыі Маскоўскага раёна захаваўся яго каментар аб хатнім гвалце. Ад імя міліцыі Майсейчык заклікаў пацярпелых не маўчаць і папярэджваў, што сямейныя канфлікты могуць заканчвацца асабліва цяжкімі злачынствамі.
Яго звольнілі з працы ў чэрвені 2015 году. У базах запісана, што падставай стаў прагул.
Згодна з пераказам аднакаменіка , у 2020 годзе Генадзь Майсейчык выходзіў на акцыі пратэсту. Яго нібыта зафіксавалі відэакамеры, але прыйшлі па былога міліцыянта толькі праз тры гады: яго затрымалі ў Мінску 12 ліпеня 2023 года.
Згодна з тым, што Майсейчык расказваў у камеры, яго затрымлівалі цэлым аўтобусам "касманаўтаў". Падчас затрымання сілавікі збілі яго сына (мае інваліднасць), а калі бацька кінуўся яго абараняць, пачалі біць і самога Майсейчыка - дубінкамі, нагамі і кулакамі. Зламалі рэбры і насавую перагародку. Пасля збіццё працягнулася ў будынку РУУС, у кабінеце, дзе некалі працаваў сам Майсейчык.
У лістападзе 2024 года прозвішча Майсейчыка з'явілася ва ўказе Лукашэнкі аб пазбаўленні былых сілавікоў воінскіх і спецыяльных званняў.
