Андрэй, кіраўнік клуба настольных гульняў «Кромверк» і адзін з арганізатараў фестывалю настольных гульняў «Юнікон», быў затрыманы ў верасні 2021 года як адміністратар аднаго з тэлеграм-каналаў і асуджаны па адміністрацыйным артыкуле. Пасля гэтага на волю ён не выйшаў — яго перавялі ў СІЗА па крымінальнай справе, узбуджанай за «абразу Лукашэнкі» і «абразу прадстаўніка ўлады».
У снежні 2021 года Андрэя прызналі вінаватым і прыгаварылі да абмежавання волі з накіраваннем у папраўчую ўстанову адкрытага тыпу. Пасля абвяшчэння прысуду яго вызвалілі з-пад варты ў зале суда, аднак увечары таго ж дня зноў затрымалі па новым эпізодзе па артыкуле «абраза прадстаўніка ўлады» за каментары ў інтэрнэце на адрас Карпянкова, Качанавай і інш.
У сакавіку 2022 года Андрэя зноў прызналі вінаватым і прыгаварылі да пазбаўлення волі ў калоніі.
Па падліках праваабаронцаў, ён быў вызвалены ў лютым 2024 года, цалкам адбыўшы прызначаны судом тэрмін пакарання.
